Tips from Mahmoud Adel

زي ما دايماً بنتقد الشركات في الـ Hiring، تعالوا نشوف "العالم المُظلم" من الناحية التانية!

اتطلب مني أرشح حد لبوزيشن Fullstack Generative AI Engineer (Senior) في شركة محترمة.

جربت معارفي الأول وبعدين نزلت بوست بمتطلبات واضحة جداً وتشيك بوكس لكل مهارة.

واللي حصل من 300 مقدم كان عبث حقيقي:

1. ناس بتقدم من غير CV ولا تفاصيل!

2. ناس بتعرف HTML/CSS بس، ومقدمين على بوزيشن Senior!

3. نسخ ولصق لمتطلبات من الـ AI من غير ما يقروا أصلاً أنا طالب إيه.

4. استهتار بمرحلة الـ Technical Screening وحجم القرارات التقنية.

5. استخدام الـ AI للرد على الأسئلة Live، وطبعاً الـ Detector كشفهم!

6. النتيجة؟ من 300 شخص، طلعنا بـ CV واحد بس بيحقق 70% من المتطلبات.

يا جماعة، العشوائية دي بتستهلك موارد الـ Recruitment وبتضيعوا فرص غيركم. ركزوا وذاكروا كويس قبل ما تقدموا في أي حاجة.

حبيت أوريك الوجه التاني عشان مش الشركات دايماً وحشة! 🤝

software_engineering

ايه انواع الكراسي الـ فعلاً ريحتكم وكانت مناسبة للشغل بين 6 لـ 12 ساعة ؟
انا عن نفسي جربت

1. الـ Tree Chair
2. والـ Emerald Chair

وعلي مدار 3 سنين كنت مرتاح بصراحه ولكن الجزء السُفلي بيهبط مع الوقت

حد عنده تجارب ؟

ايه موضوع المينتورشيب او التوجيه ده ؟ - يعني ايه ادفع فلوس في ميتنج ؟

ببساطة الفكرة بدأت من موقع أجنبي مشهور موجود فيه معظم الـ Software Engineers الـ في العالم والـ شغالين في ميتا وشغالين في فيسبوك وغيره , ولكن أسعارهم مُبالغ فيها جداً لدرجة إن الميتنج الواحد بيكلفك 500 دولار

وطبعاً في وطنا العربي مفيش خدمة زي دي رغم ان عندنا كوادر كتير جداً محترمين تقدر تستفاد منهم ,

علشان كده عملنا موديول المينتورشيب , علشان الناس الـ عندها خبرة تقدر تفيد بعض

الفكرة الحلوة هنا انك مش لازم تكون جنيور او طالب علشان تستفاد , كفاية جداً انك تاخد استشارة في اي مجال انت عايزه , باسعار غريبة جداً يعني ممكن تدخل إستشاره كامله لـ ساعتين بـ 300 لـ 700 جنيه , الـ هو ثمن قهوة وكيك

وطبعاً بما إن منصة مونسترزغيت كانت بتقدم كورسات , قولت ليه مخليش المينتور يبقي موجود مع الكورسات بحيث انك تتعلم وفي نفس الوقت تلاقي حد تستشيره

انا محتاج منكم تجربوا الموديول وتقولولي رأيكم

دخل معايا شخص عبقري تم إستغلاله من الشركات

في جلسة الإستشارة عرفت إنه مر بمراحل كتيرة جداً في الكارير بتاعه تخليه يحس انه Senior لإنه

1. تفوق في مشروع الجامعه
2. تفوق في الـ ITI ومنحة مصر الرقمية
3. تفوق في التعامل مع الناس وطريقة الكلام واكتسب Soft Skills رهيبه

وده الـ خلاه يتعرض للإستغلال المهني , وده بيكون بسبب شخص موجود في الأغلب بكل مكان لم بيشوف طالب شاطر بيبقي عايز يرشحه لشركة مُعينه بهدف انه يكتسب خبرة وانه يشتغل .

ولإن الطالب بيكون نفسه جداً في الفرصة دي بيوافق بمبلغ زهيد جداً

وبيلاقي نفسه في شركة ملهاش هيكل إداري ولا للفريق

مُعتمدين عليه في كل حاجه

مبياخدش فلوس كفايه مُقابل الـ هو بيقدمه

علشان كده هديك نصيحة النهارده ( مش كل تدريب هو فرصة )

اي تدريب او فرصة توظيف لازم تسأل قبلها المسئول عن ( هيكل الترقيات /Staff Movement )

فيما معناه , انا بعد فترة طويلة هكون ايه ؟

هل هفضل زي ما انا متدرب

هل هفضل جنيور و تستغلوني براحتكم ؟

هل مُرتبي هيزيد ؟

ممكن تشوف ان ده في البداية Redflag وتبقي خايف انهم ميقبلوش بيك

ولكن صدقني الـ هيحصلك بعدها بسبب موافقتك علي شركة انت متعرفش هيكلها الداخل عامل ازاي هيكون اسوء من انك تقعد من غير شغل او من غير تدريب , لإنك هتلاقي نفسك في الاخر حاطت في ال ـCV انك 3 سنين خبرة وفي الحقيقه متقدرش تحسب انك سنة واحده حتي بسبب الـ هم عملوه فيك.

لو معاك قرشين زيادة وشغال من البيت، دي شوية "رفاهيات مهمة" لو جربتها هتفرق جداً في صحتك النفسية والجسدية وإنتاجيتك:

1- مسند الماوس والكيبورد: مخدة صغيرة بتتحط تحت إيدك بتحمي عروقك جداً

2- كيبورد ميكانيكال (Blue Switch): صوته عالي شوية، بس ممتع جداً في الكتابة وكأن الزراير بتنطرك للي بعده، ومريح جداً في الشغل الطويل.

3- كرسي طبي: بلاش كراسي الجيمنج، وهات كرسي ثلاثي الدعامات داعم للرقبة، وأهم حاجة مساند إيده تتحرك مع كوعك.

4- إضاءة الشاشة (Monitor Light): بتنور مكتبك من غير ما تنور الأوضة كلها، مريحة للعين وبتدي شكل رهيب للسيتاب.

5- حامل الشاشات (Arms): بيرفع الشاشات لمستوى نظرك عشان تحافظ على رقبتك من الوجع وماتضطرش تروح تتعالج.

6- حامل الموبايل: بيخلي الفون قدام عينك وبيشحن، من غير كركبة أسلاك وعلشان تشوف النوتيفيكيشنز براحتك.

7- شاشة بالطول (Vertical): ممتازة للمبرمجين في قراءة الكود براحة وسرعة، وممكن تجيبها استيراد بسعر رخيص. 8- الـ Pegboard: لوح تخريم بيتعلق على الحيطة عشان تعلق عليه السماعة، الكاميرا وأدواتك، بينظم الدنيا وشكله شيك.

10- قاعدة المجات الذكية: بتحافظ على قهوتك سخنة أو مشروبك ساقع وانت شغال.

11- حامل لابتوب: حامل بيطلع وينزل معاك وبيبرد اللاب في نفس الوقت.

أما لو عايز تدلع نفسك عـ الآخر، هات جهاز مساج لرقبتك ودفاية لرجلك تعمل مساج وتدفيك!